நாட்டின் பொருளாதாரம் தொடர்பில் எதிர்க்கட்சிகள் எப்போதும் தங்கள் விமர்சனங்களை சர்வதேச நாணய நிதியத்தின் கட்டமைப்பில் இருந்தே முன்வைக்க வேண்டும் என முன்னாள் ஜனாதிபதி ரணில் விக்கிரமசிங்க விசேட அறிக்கையொன்றில் தெரிவித்துள்ளார்.
எதிர்க்கட்சிகள் பொதுவாக அரசாங்கத்தைப் புகழ்வதில்லை என்றாலும், அதன் விமர்சனம் சர்வதேச நாணய நிதியத்தின் கட்டமைப்பிற்குள் இருந்து செய்யப்பட வேண்டும் என்றும் அவர் கூறினார்.
சர்வதேச நாணய நிதியத்தின் கட்டமைப்பிற்கு அப்பால் செயற்படுவதற்கு அரசாங்கமோ அல்லது எதிர்க்கட்சியோ தகுதியற்றவர்கள் என முன்னாள் ஜனாதிபதி மேலும் தெரிவித்தார்.
முன்னாள் ஜனாதிபதி ரணில் விக்கிரமசிங்க மேலும் தெரிவித்ததாவது:
“2024 ஆம் ஆண்டில், சர்வதேச நாணய நிதியம் இந்த நாட்டின் பொருளாதார வளர்ச்சியை இரண்டு சதவீதமாக மதிப்பிட்டுள்ளது. நான் அந்த வளர்ச்சி விகிதத்தை இன்னும் அதிகரிக்க விரும்பினேன். எனவே, ஆண்டின் தொடக்கத்தில் இருந்தே திறன் பயன்பாட்டை அதிகரிக்க மக்கள் மற்றும் வணிகர்களால் நாங்கள் ஊக்குவிக்கப்பட்டோம். இதன் காரணமாக நமது பொருளாதார வளர்ச்சி விகிதம் இன்று ஐந்து சதவீதத்தை எட்டியுள்ளது. அதற்காக உழைத்த நிதி அமைச்சு, மத்திய வங்கி மற்றும் ஜனாதிபதி அலுவலகம் ஆகிய அனைவருக்கும் நான் நன்றி கூறுகின்றேன். நாட்டின் திறன் பயன்பாட்டை அதிகரிக்க உழைத்த மற்ற அனைவருக்கும் நாம் நன்றி சொல்ல வேண்டும். நாட்டின் மொத்த உள்நாட்டு உற்பத்தி அதிகரித்துள்ளதால், அதில் ஒரு பகுதியை வரி வருவாயாக பெற்றுள்ளோம். அதுவும் எங்கள் வருமானம் அதிகரிக்க வழிவகுத்தது.
IMF உடனான ஒப்பந்தத்துக்குள் இதையெல்லாம் செய்ய முடிந்தது. எனவே, அந்த ஒப்பந்தத்தை முன்னெடுத்துச் சென்று பாதுகாக்க வேண்டியது அவசியம். அரசாங்கமோ அல்லது எதிர்க்கட்சியோ உடன்படிக்கையை விட்டு வெளியேற முடியாது. இப்படிச் செய்தால் மீண்டும் இந்த நாட்டில் பொருளாதாரப் பிரச்சினைகள் உருவாகும். குறிப்பாக டிசம்பர் 20ஆம் திகதிக்கு முன், புதிய சர்வதேச பத்திர கூப்பன்களை வெளியிட உள்ளோம்.
அந்த நடவடிக்கைகள் அனைத்தும் தற்போது முடிந்துவிட்டன. நாம் இப்போது திவால் நிலையில் இருந்து மீண்டு விட்ட அறிவிப்பை வெளியிட வேண்டும். அதன் பிறகு, வங்கிகளில் இருந்து தேவையான நிவாரண நடவடிக்கைகள் எடுக்கப்படும். அதேநேரம் மக்களுக்கு நிவாரணம் வழங்க வேண்டும். இதைப் பற்றி முன்பே பேசினோம். இயன்ற நிவாரணங்கள் விரைவில் வழங்கப்பட வேண்டும். தற்போது 1 லட்சத்தில் இருந்து 1இலட்சத்து ஐம்பது ஆயிரமாக வரி செலுத்தும் நிலை அதிகரிக்கப்பட்டுள்ளது, அதை 2 லட்சமாக கொண்டு வர ஐஎம்எப் நிறுவனத்திடமும் விவாதித்தேன். அதற்கு அவர்கள் சம்மதிக்கவில்லை.
பொருளாதாரம் வலுப்பெற்றவுடன் நாம் அதற்கேற்ப செயல்பட்டு அதிக சலுகைகளை வழங்க வேண்டும். இந்த திட்டத்தில் அரசு இருக்க வேண்டும். இதிலிருந்து விடுபட வழியில்லை. வீண் விமர்சனம் செய்வதில் எந்த அர்த்தமும் இல்லை என்பதை எதிர்க்கட்சியினரிடம் கூறுகிறேன். பொதுவாக எதிர்க்கட்சிகள் ஒரு அரசாங்கத்தைப் பாராட்டப் போவதில்லை..”
