மட்டக்களப்பு வலயக் கல்வி அலுவலகத்தால் ஏற்பாடு செய்யப்பட்ட சாதனையாளர்களின் பாராட்டு விழா கடந்த 22 மற்றும் 23 ஆம் திகதிகளில் மட்டக்களப்பு சிசிலியா பெண்கள் கல்லூரியின் பிரதான மண்டபத்தில் மிக விமரிசையாக நடைபெற்றது.
மாணவர்கள், ஆசிரியர்கள், அதிபர்கள், விளையாட்டுப் பயிற்சியாளர்கள் என அனைவரையும் ஊக்குவிக்கும் வகையில், அவர்கள் விருதுகள் வழங்கி கௌரவிக்கப்பட்டனர்.
மட்டக்களப்பு கல்வி வலயத்தில் க.பொ.த (சா/த) பரீட்சையில் 9 விசேட சித்திகளைப் பெற்றவர்களுக்கும், உயர்தரத்தில் விசேட சித்தி பெற்று பல்கலைக்கழகங்களுக்கு தெரிவாகிய மாணவர்களுக்கும் சான்றிதழ்கள் வழங்கி வைக்கப்பட்டதுடன் நாடகம், நடனம், பாடல், மற்றும் விளையாட்டுத் துறை ஆகிய இணைப் பாடவிதான செயற்பாடுகளில் தேசிய மட்டத்திலும் மாகாண மட்டத்திலும் கலந்து கொண்டு தமது திறமைகளை வெளிப்படுத்தி வெற்றி பெற்று பதக்கங்களை சுவீகரித்து பாடசாலைக்கு பெருமை சேர்த்த மாணவர்களும் கௌரவிக்கப்பட்டனர்.
அவர்களை கௌரவிக்கும் முகமாக வலயக் கல்விப் பணிப்பாளர் திருமதி எஸ்.குலேந்திரகுமார்
தலைமையில் இந்நிகழ்வு இடம்பெற்றது.
அதில் கிழக்கு மாகாண ஆளுநர் கௌரவ பேராசிரியர் ஜயந்த லால் ரத்னசேகர பிரதம விருந்தினராக கலந்து கொண்டு சிறப்பித்தார்.
அத்தோடு கிழக்கு மாகாண பிரதம செயலாளர் ஆர்.எம்.பி.எஸ். ரத்நாயக்க, இளைஞர் விவகாரம் மற்றும் புனர்வாழ்வு -(கிழக்கு மாகாணம்) செயலாளர் எச்.ஈ.எம்.டபிள்யு. ஜீ. திசாநாயக்க
ஆகியோர் சிறப்பு விருந்தினர்களாக கலந்து கொண்டனர். இரண்டாம் நாள் விழாவில் விளையாட்டு மற்றும் இளைஞர் விவகார அமைச்சின் முன்னாள் செயலாளர் கே. மகேசன் பிரதம விருந்தினராக கலந்து கொண்டார். விளையாட்டுத் திணைக்கள மாகாணப் பணிப்பாளர் எம்.ஆர்.யு. சிவராஜா, மட்டக்களப்பு தேசிய கல்வியியல் கல்லூரியின் விரிவுரையாளர் திருமதி.டி. மோகனகுமார், உடற்கல்வி பயிற்றுவிப்பாளர் திருமதி.எம். அரவிந்தன் ஆகியோர் சிறப்பு விருந்தினர்களாக கலந்து கொண்டு சிறப்பித்தனர்.
(புதிய காத்தான்குடி தினகரன் நிருபர்)
The post மட்டக்களப்பு வலயக்கல்வி அலுவலகத்தின் ஏற்பாட்டில் சாதனையாளர் பாராட்டுவிழா appeared first on Thinakaran.
