வாழ்த்து தெரிவித்த பிரதமர் மோடியிடம் டிரம்ப் வைத்த கோரிக்கை

அமெரிக்க அதிபராக குடியரசுக் கட்சியைச் சேர்ந்த டொனால்டு டிரம்ப், கடந்த 20-ஆம் தேதி பதவியேற்றுக் கொண்டார். இந்த விழாவில், இந்தியா சார்பில் வெளியுறவுத் துறை அமைச்சர் ஜெய்சங்கர் கலந்து கொண்டார். இந்நிலையில், டொனால்டு டிரம்பை பிரதமர் நரேந்திர மோடி நேற்று தொலைபேசியில் தொடர்புகொண்டு பேசினார். இதுதொடர்பாக மத்திய அரசு வெளியிட்டுள்ள செய்திக்குறிப்பில், அமெரிக்காவின் 47-ஆவது அதிபராக பதவியேற்றதற்காக டொனால்டு டிரம்புக்கு பிரதமர் வாழ்த்து தெரிவித்ததாகத் தெரிவிக்கப்பட்டுள்ளது.

பரஸ்பரம் பலன் அளிக்கும் வகையில் செயல்படவும், நம்பிக்கைக்குரிய கூட்டாளியாக இருக்கவும் உறுதிபூண்டுள்ளதாகக் குறிப்பிடப்பட்டுள்ளது. தொழில்நுட்பம், வர்த்தகம், முதலீடு, எரிசக்தி, பாதுகாப்பு உள்ளிட்ட துறைகளில் ஒத்துழைப்பை மேம்படுத்தவும், இருதரப்பு ஒத்துழைப்பு குறித்து விவாதிக்கப்பட்டதாகவும் தெரிவிக்கப்பட்டுள்ளது.

மேற்கு ஆசியா மற்றும் உக்ரைனில் நிலவும் சூழல் உள்ளிட்ட சர்வதேச விவகாரங்கள் குறித்து கருத்துகள் பரிமாறப்பட்டதாகவும், சர்வதேச அமைதி, வளம் மற்றும் பாதுகாப்புக்காக ஒருங்கிணைந்து பணியாற்ற உறுதிபூண்டுள்ளதாகவும் தெரிவிக்கப்பட்டுள்ளது. மேலும், தொடர்ந்து தொடர்பில் இருக்கவும், விரைவில் சந்தித்துப் பேசவும் இரு தலைவர்களும் ஒப்புக் கொண்டதாக மத்திய அரசு தெரிவித்துள்ளது.

இதற்கிடையே, பிரதமர் மோடியுடன் டிரம்ப் மேற்கொண்ட தொலைபேசி உரையாடல் குறித்து அறிக்கை வெளியிட்டுள்ள வெள்ளை மாளிகை, பிரதமர் மோடியுடன் பயனுள்ள பேச்சுவார்த்தையை டிரம்ப் நடத்தியதாகத் தெரிவித்துள்ளது. இருதரப்பு ஒத்துழைப்பை விரிவுபடுத்துவது குறித்து இருவரும் பேசியதாகவும், இந்தோ-பசிபிக், மத்திய கிழக்கு மற்றும் ஐரோப்பாவில் பாதுகாப்பு சூழல் உள்ளிட்ட பிராந்திய விவகாரங்கள் குறித்து விவாதிக்கப்பட்டதாகவும் தெரிவிக்கப்பட்டுள்ளது.

Also Read | காதலிப்பதாக கூறி அழைத்துச் சென்று 3 சிறுமிகளுக்கு வன்கொடுமை.. சென்னையில் பகீர் சம்பவம்!

அமெரிக்காவில் தயாரிக்கப்பட்ட பாதுகாப்பு உபகரணங்களை அதிக அளவில் இந்தியா வாங்குவதன் அவசியத்தை எடுத்துரைத்த டிரம்ப், இருதரப்பு வர்த்தக உறவை மேம்படுத்த வேண்டும் என்று வலியுறுத்தியதாகவும் தெரிவிக்கப்பட்டுள்ளது. அமெரிக்காவுக்கு பிரதமர் மோடி பயணம் மேற்கொள்வது குறித்து விவாதிக்கப்பட்டதாகவும் வெள்ளை மாளிகை தெரிவித்துள்ளது.