இந்திய அணி பேட்டிங் வரிசையில் மாற்றம்… 2 ஆவது டெஸ்டில் ஆஸ்திரேலியாவுடன் நாளை மோதல்

இந்திய அணி ஆஸ்திரேலியாவில் சுற்றுப் பயணம் மேற்கொண்டு 5 போட்டிகள் கொண்ட டெஸ்ட் தொடரில் விளையாடி வருகிறது. முதல் போட்டியில் இந்திய அணி வெற்றி பெற்றுள்ள நிலையில், 2 ஆவது மேட்ச்சில் குறிப்பிடத்தக்க மாற்றங்கள் செய்யப்படவுள்ளன. முதல் மேட்ச்சில் தனிப்பட்ட காரணங்களுக்காக விளையாடாத ரோஹித் சர்மா 2 ஆவது ஆட்டத்தில் களம் காண உள்ளார்.

2 ஆவது மேட்ச்சிலும் கே.எல். ராகுல் விளையாடுவார் என்பது உறுதி செய்யப்பட்டுள்ளது. இந்திய அணியின் தொடக்க வீரர்களாக கே.எல். ராகுல் மற்றும் யஷஸ்வி ஜெய்ஸ்வால் களம் இறங்குவார்கள் என்று எதிர்பார்க்கப்படுகிறது.

இருவரும் பெர்த்தில் நடைபெற்ற முதல் போட்டியின் 2 ஆவது இன்னிங்ஸில் முதல் விக்கெட்டிற்கு 201 ரன்கள் பார்ட்னர்ஷிப் அமைத்தனர். காயம் காரணமாக முதல் போட்டியில் விளையாடாத சுப்மன் கில் 2 ஆவது மேட்ச்சில் விளையாடவுள்ளார்.

அவர் 3 ஆவது பேட்ஸ்மேனாக களம் இறங்குவார் என்று எதிர்பார்க்கப்படுகிறது. முதல் போட்டியில் விளையாடிய தேவ்தத் படிக்கல் போதிய ரன்கள் குவிக்கவில்லை. இதனால் அவர் 2ஆவது போட்டியில் விளையாட மாட்டார் என்று தகவல்கள் தெரிவிக்கின்றன.

விராட் கோலி வழக்கம் போல 4 ஆவது பேட்ஸ்மேனாகவும், 5 ஆவது இடத்தில் ரிஷப் பந்த்தும் விளையாடுவார்கள். ரோஹித் சர்மா 6 ஆவது பேட்ஸ்மேனாக விளையாடுவார் என்று எதிர்பார்க்கப்படுகிறது. கடந்த 2019 ஆம் ஆண்டிலிருந்து இந்திய அணியின் தொடக்க வீரராக ரோஹித் சர்மா விளையாடி வருகிறார். முதல் போட்டியில் விளையாடிய துருவ் ஜுரெல் 2ஆவது டெஸ்டில் விளையாட மாட்டார்.

இதையும் படிங்க – ‘10 ஆண்டுகளாக பட்டர் சிக்கன் சாப்பிட்டது கிடையாது’ – கோலியின் ஃபிட்னஸ் ரகசியம் பகிர்ந்த அனுஷ்கா சர்மா

மற்றபடி இந்திய அணி முதல் டெஸ்டில் பும்ரா, சிராஜ், ஹர்ஷித் ராணா ஆகிய 3 வேகப்பந்து வீச்சாளர்களுடன் ஆல் ரவுண்டர்கள் நிதிஷ் குமார் ரெட்டி, வாஷிங்டன் சுந்தருடன் விளையாடியது. இவர்களும் 2 ஆவது டெஸ்டில் நீடிப்பார்கள் என்று எதிர்பார்க்கப்படுகிறது.

2 ஆவது டெஸ்டில் விளையாடும் உத்தேச வீரர்கள் – கே.எல்.ராகுல், யஷஸ்வி ஜெய்ஸ்வால், சுப்மன் கில், விராட் கோலி, ரிஷப் பந்த், ரோஹித் சர்மா, நிதிஷ் குமார் ரெட்டி, வாஷிங்டன் சுந்தர், ஹர்ஷித் ரானா, ஜஸ்பிரித்பும்ரா, முகம்மது சிராஜ்.