இந்தியன் 2 திரைப்படம் தோல்வியடைந்த நிலையில் இந்தியன் 3 திரைப்படம் ஓ.டி.டி தளங்களில் வெளியாகும் என செய்திகள் பரவின. இந்த நிலையில் அதனை மறுத்துள்ள இயக்குனர் ஷங்கர் இந்த திரைப்படம் திரையரங்குகளில் பிரமாண்டமாக ரிலீஸ் ஆகும் என்று கூறியுள்ளார்.
இயக்குனர் ஷங்கர் – கமல்ஹாசன் காம்போவில் வெளியான இந்தியன் படத்தின் முதல் பாகம் மிகப்பெரும் வரவேற்பை பெற்று வசூலிலும் சாதனை படைத்தது. இதற்கு சுமார் 26 ஆண்டுகளுக்கு பின்னர் இந்தியன் 2 திரைப்படம் கடந்த ஜூலை மாதம் வெளியானது. இந்த படத்தின் மீது எதிர்பார்ப்பு அதிகம் காணப்பட்டாலும் திரைக்கதை சுமாராக இருந்ததால் போதிய வரவேற்பை பெறவில்லை.
மேலும் இணையதளங்களில் இந்த படத்துடைய காட்சிகள் கேலி கிண்டலுக்கு ஆளானது. இந்தியன் 2 க்ளைமேக்சின்போது மூன்றாம் பாகத்துடைய சில காட்சிகள் இடம் பெற்றிருந்தன. இந்த நிலையில் படம் தோல்வி அடைந்ததால் இந்தியன் 3 தியேட்டர்களில் ரிலீஸ் ஆகாமல் ஓடிடி-யில் வெளியாகும் என பேசப்பட்டது.
இந்நிலையில் இந்த தகவலை மீண்டும் மறுத்துள்ள இயக்குனர் ஷங்கர் இந்தியன் 2 படத்திற்கு கிடைத்த நெகட்டிவ் விமர்சனங்களை நான் எதிர்பார்க்கவில்லை. அந்த நிலையிலிருந்து அடுத்த கட்டத்திற்கு நகர்ந்து விட்டோம். மூன்றாம் பாகம் பிரம்மாண்டமாக திரையரங்குகளில் வெளியாகும்.
இந்தியன் 2 திரைப்படம் ஒரு நல்ல மெசேஜை ரசிகர்களிடம் சொல்ல முயற்சித்தது. அந்த வகையில் நான் மகிழ்ச்சி அடைகிறேன். வீடு தூய்மையாக இருந்தால் நாடும் தூய்மையாக இருக்கும் என்ற கருத்தை கூறியிருந்தோம் என்று தெரிவித்தார்.
இதற்கிடையே ஷங்கர் இயக்கியுள்ள ராம் சரணின் கேம் சேஞ்சர் திரைப்படம் பொங்கலையொட்டி வெளியாக உள்ளது. இதற்கான ப்ரமோஷன் பணிகளில் படக்குழுவினர் தீவிரம் காட்டி வருகின்றனர்.
.
