Last Updated:
SK25 | தற்போது புது காம்போ இணைந்திருப்பதால் இந்தப் படத்தின் ‘புறநானூறு’ என்ற தலைப்பை மாற்றியிருப்பதாக தகவல் வெளியாகியுள்ளது.
சுதா கொங்கரா இயக்கத்தில் சிவகார்த்திகேயன் நடிக்கும் படத்தின் தலைப்பு ‘புறநானூறு’ இல்லை என்ற தகவல் வெளியாகியுள்ளது. மேலும் படம் தற்போது வரை ‘எஸ்கே25’ என்றே அழைக்கப்பட்டு வருகிறது.
‘அமரன்’ படத்தின் மாபெரும் வெற்றிக்குப் பிறகு, ஏ.ஆர்.முருகதாஸ் இயக்கி வரும் படத்தில் கவனம் செலுத்தி வருகிறார் சிவகார்த்திகேயன். அதற்குப் பிறகு சிபி சக்கரவர்த்தி மற்றும் சுதா கொங்கரா இருவரது இயக்கத்தில் நடிக்க ஒப்பந்தமாகி இருக்கிறார். இதில் சுதா கொங்கரா இயக்கும் படத்தின் படப்பிடிப்பு டிசம்பர் 14-ம் தேதி முதல் சென்னையில் தொடங்கி இருக்கிறது.
இதில் ஜெயம் ரவி, அதர்வா, ஸ்ரீலீலா உள்ளிட்ட பலர் சிவகார்த்திகேயன் உடன் நடிக்க ஒப்பந்தம் செய்யப்பட்டுள்ளனர். இது சிவகார்த்திகேயன் நடிப்பில் உருவாகும் 25-வது படமாகும். இதனை டான் பிக்சர்ஸ் நிறுவனம் சார்பில் ஆகாஷ் பாஸ்கரன் தயாரிக்கிறார். இதன் முதற்கட்ட படப்பிடிப்பு சென்னையில் உள்ள பின்னி மில்லில் தொடங்கியது.
இதையும் வாசிங்க: ராஜமவுலி – மகேஷ்பாபு இணையும் படத்தின் ஷூட்டிங் பூஜையுடன் தொடக்கம்… கவனம் பெறும் வீடியோ…
முன்னதாக சூர்யா, துல்கர் சல்மான், நஸ்ரியா உள்ளிட்ட பலர் நடிப்பில் தொடங்கப்பட்ட படம் ‘புறநானூறு’. இதன் முதற்கட்ட பணிகளின் போது சுதா கொங்கரா – சூர்யா இடையே கருத்து வேறுபாடு ஏற்பட்டு இப்படம் கைவிடப்பட்டது.
இந்நிலையில் தற்போது புது காம்போ இணைந்திருப்பதால் இந்தப் படத்தின் ‘புறநானூறு’ என்ற தலைப்பை மாற்றியிருப்பதாக தகவல் வெளியாகியுள்ளது. படம் 1965 காலக்கட்டத்தில் நடைபெற இருப்பதால், படத்தின் தலைப்பை ‘1965’ என மாற்றியிருக்கிறார்கள் எனக் கூறப்படுகிறது. இருப்பினும் அதிகாரபூர்வ அறிவிப்பு இன்னும் வெளியாகவில்லை.
January 03, 2025 8:05 AM IST
